İstifadəçi təcrübəsi 7 dəqiqə

İstifadəçi Təcrübəsinin bizneslərə təsiri

İstifadəçi Təcrübəsinin bizneslərə təsiri - Emotix

Deyirlər, təcrübənin pisi-yaxşısı olmaz. Bəs bu, həqiqətən də belədirmi?

 

Biz deyərdik ki, yox. Bəzən uğursuz istifadəçi təcrübəsi bizneslərin də uğursuzluğu ilə nəticələnə bilir. Əslində bunu tək biz demirik. “Usability Geek”in təsisçisi Justin Mifsund da öz araşdırmaları ilə bizi təsdiq edir: 

 

“Onlayn istifadəçilərin 88%-i pis təcrübə nəticəsində veb-səhifəni tərk edir.”

 

Bəs uğurlu istifadəçi təcrübəsi yaratmaq üçün sadəcə gözə xoş görünən dizayn yetərlidirmi? Bu suala da yox cavabını verərdik. Təəssüf ki, yaxşı dizayn yaxşı istifadəçi təcrübəsinə qarantiya vermir. Önə sürülən məhsulun (veb-saytlar, mobil tətbiqlər və s.) dizaynı gözdən əlavə, rahatlığa da xitab etməlidir. İstifadəçinin gözünü yormayan, asan oxuna bilən və rahatlıqla istifadə edilən dizaynlar istifadəçilər tərəfindən daha çox sevilir və uğurlu istifadəçi təcrübəsi ilə nəticələnir.

 

Dizaynı sevən istifadəçi nə edir? Təbii ki, sizin məhsulunuzla daha çox zaman keçirir. Araşdırmalar bizə bunu deyir ki, istifadəçilər dizaynı sevib-sevmədiklərini elə sayta daxil olduqları ilk saniyələrdə qərarlaşdırır. Nəzərə alsaq ki, veb səhifəni tərk etmək də 1 dəqiqədən daha az vaxtımızı alır, bu o deməkdir ki, siz pis dizayn nəticəsində istifadəçilərinizin 88%-ni hələ qazanmamış, 1 dəqiqədən daha az müddətdə itirisiniz. 

 

Gəlin bu 1 dəqiqədən daha az müddətdə nələr baş verdiyinə nəzər yetirək.

 

İstifadəçiləri nə narazı salır?

İstifadəçi qayğı istəyir... İstifadəçi diqqət istəyir…

İstifadəçilər sadəcə onlara təqdim olunan məhsulu rahat istifadə etmək istəyir. 

 

Bilirik, istifadəçiləri 100% məmnun etmək, demək olar, mümkün deyil. Hər zaman narazı istifadəçilər olacaq. Narazı istifadəçiləri azaltmaq isə, təbii ki, mümkündür. 

İstifadəçilərin nə istədiyini anlamaq üçün ilk olaraq onları nələrin narahat hiss etdirdiyinə nəzər yetirə bilərik:

 

Dizayna tez-tez dəyişiklik edilməsi

İstifadəçilərin öyrəşdiyi “button”ların yerinin dəyişməsi, hələ edilmiş dəyişikliyə öyrəşmədən yeni bir funksionallıq gətirilməsi, tez-tez alqoritmin dəyişməsi və s. kimi hadisələr bütün növ istifadəçi qrupları tərəfindən xoş qarşılanmır.

 

Yorucu rəng palitrası

Gündəlik həyatında yetərincə stress keçirib, yorulan istifadəçini bir-birinə zidd, gözü yoran, qarışıq rənglər ilə daha da incitməyə ehtiyac yoxdur. Statistika göstərir ki, sakit, maksimum az rəngdən istifadə edərək hazırlanmış dizaynlar daha doğru seçimdir.

 

Hədsiz dolu və qarışıq dizayn 

Bir-birinə çox yaxın olan elementlər, hədsiz dolu mətn, qarışıq vektorlar istifadəçinin fikrinin yayınmasına səbəb olur. Lazımi informasiyanı mümkün olduğu qədər qısa və sadə formada istifadəçiyə çatdırmaq dizaynerin başlıca məqsədi olmalıdır. Buna görə də dizayn edərkən istifadəçilərin gözünün alışdığı tərzdə etmək daha məqsədəuyğun sayılır.

 

İstifadəçinin nəzərə alınmadığını düşünməsi

Dizayn edən zaman hər yaşdan istifadəçi qrupu nəzərə alınmalıdır. Xüsusilə də, məhsul geniş kütlə üçün nəzərdə tutulubsa. Məsələn: Gənc istifadəçilər ilə yaşlı istifadəçilərin istifadə vərdişləri arasında fərq hiss edilir. Ancaq gəncləri nəzərə alaraq edilən dizaynlar, yaşlı istifadəçilər tərəfindən istifadə zamanı narahatlıq doğura bilər.

 

Təəssüf ki, bəndləri sadalamağa davam edə bilərik. Amma bütün bəndlərin ortaq nöqtəsi buna gətirib çıxarır ki, istifadəçilər nəzərə alınmadan edilən dizaynlar uğurlu nəticə vermir.

 

Uğursuz istifadəçi təcrübəsinin bizneslərə təsiri

Bir çox biznes sahibi yaxşı istifadəçi təcrübəsinin önəmindən xəbərsiz, biznesinə artıqlaması ilə gəlir gətirə biləcəyindən məlumatsızdır. Bəzən məlumatlı olsalar belə, onlara istifadəçi təcrübəsinin araşdırılması prosesi yorucu, uzun gəlir. Nəticədə isə sadəcə biznes sahibi tərəfindən bəyənilən dizayn və məhsul ərsəyə gəlir. 

 

Təbii ki, biznes sahibi olaraq öz zövqünüzə uyğun məhsul ərsəyə gətirmək istəyə bilərsiniz. Amma istifadəçi kütləsi ilə sizin zövqünüz eyni olmaya bilər. Bu yerdə fikrimizcə istifadəçini seçmək daha doğru olar. Biznesinizin uğurlu olmasında istifadəçilərin rolu böyüktür. 

 

Biznes sahibləri üçün öz məhsullarının görüntüsü çox önəmli olsa da, istifadəçilər tərəfindən bu xoş görüntü uğursuz təcrübəyə çevrilə və biznesdə itkiyə səbəb ola bilərr. Buna görə də bizneslər gəlirləri barədə düşünərkən hesaba istifadəçilərin maraqlarını da qatmağı unutmamalıdır deyərdik.

 

Amma qeyd edək ki, üzərində düşünülmüş və araşdırılmış fikir istifadəçilərə xoş gəlmirsə, bu, sizin fikrinizdə problem olduğunu göstərmir. Məsələ istifadəçiyə fikrinizi necə çatdırmağınızda da ola bilər. İstifadəçi tərəfindən başa düşülməyən və istifadə edilə bilməyən fikirin sizə qazanc gətirməsi bir az qəliz məsələdir. 

 

Qısası, biznesdə uğur qazanmaq istəyirsinizsə, ilk olaraq istifadəçiləri məmnun etməlisiniz. 

 

Uğursuz istifadəçi təcrübəsinin qarşısını necə alaq?

 

Bəzən böyük yatırımlar edilərək başlanılan bizneslər, ideyası çox yaxşı olsa belə, istifadəçilərin nəbzini tuta bilmədikləri üçün iflasa uğraya bilir. 

 

Bunun qarşısını almaq üçün hər şeydən öncə biznesin strategiyası mümkün qədər müştəri yönümlü qurulmalıdır. İlk növbədə özünüzə “Mənim məhsulum hansı problemi həll edir?” sualını verməlisiniz. Bu sualın cavabında, sözsüz ki, məhsulunuzun həll edəcəyi problemdən ən çox gileylənən istifadəçi kütləsini tapmış olacaqsınız. Bundan sonra öz istifadəçi kütlənizi harada axtarmalı olduğunuzu aydın görəcəksiniz. 

 

Daha aydın olması üçün qısa bir nümunə çəkək: 

 

Tutaq ki, məhsulumuz lüks taksi xidməti biznesidir və bu xidməti mobil tətbiq vasitəsilə göstəririk. Məlumdur ki, lüks olduğu üçün digər taksi xidmətlərinə nəzərən daha bahalıdır və istifadəçi kütləsi maddi imkanı yüksək istifadəçilərdir. Deməli, strategiyamızı maddi imkanı yüksək istifadəçilərə yönümlü qurmalıyıq.

 

Əgər sistifadəçi kütləsi sizə məlumdur, amma yenə də uğursuz istifadəçi təcrübəsi ilə üzləşirsinizsə, deməli, ya istifadəçi kütlənizi doğru araşdırmamış, ya da nə istədiklərini doğru analiz etməmiş ola bilərsiniz. Amma narahat olmayın, çünki problemi həll etmək üçün hələ gec deyil. Hər zaman məhsulunuzun hazırki istifadəçiləri və ya potensial istifadəçiləri arasında araşdırmalar edə bilərsiniz. 

 

Bu yerdə sizdə sual yarana bilər:  “Bəs araşdırmaları necə etmək lazımdır?”. Ən rahat üsul kimi üz-üzə söhbət, daha profesional, çox kütləyə çata biləcək üsul olaraq isə anket və sorğular sizin köməyinizə çata bilər.  

 

Araşdırma nəticələri bizə çox şey deyir. Məsələn, ola bilər ki, siz məhsulunuzu başqa rəng, forma, hətta tamamilə başqa məqsəd üçün ərsəyə gətirirsiniz, amma araşdırmaların nəticəsi tamam fərqlidir. Bu halda məhsulda düzəlişlər edib, yenidən araşdırmalar etməyə ehtiyac olacaq. Həm sizin biznes planınıza, həm də istifadəçilərin maraqlarına uyğun strategiya qurmaq hər zaman mümkündür. Unutmayın ki, bu uzun, amma faydalı prosesdir.  

 

Əgər məqaləmizi sona qədər oxudunuzsa, deməli, siz istifadəçisini önəmsəyən, ya da önəmsəməyə başlayan biznes sahibisiniz. Bu yazını biznesinizin uğurlu istifadəçi təcrübəsinə gedən yolda bir rəhbər kimi görə bilər və istifadə edə bilərsiniz. Uğurlar! 

Yazını necə dəyərləndirərdiniz?

Yazarlarımız arasına qoşul!

200+ nəfərdən ibarət böyük bir komandayıq! Xidmətlərimizə isə yeni startaplardan tutmuş, böyük müəssisələrədək bütün bizneslər üçün məhsul dizayn etmək, proqram təminatı yaratmaq və yaradıcı marketinq həlləri tapmaq daxildir.

Əlaqə

Digər yazarlardan

Xidmətlərinizi yenidən dizayn edək

Hər bir layihəyə fərdi yanaşaraq müştərilərimizin və onların müştərilərinin xüsusi ehtiyaclarını qarşılayacaq həllər dizayn edirik.

Müraciət edin